تفنطها
تفنّطها ..
و تِقْسِم بين ورقها كتير ..
تجيب أولها في الآخر
تسيب أواخرها للمشاوير ..
و لو كان الورق فيه خير
أكيد كان جابلك البصره ..
كسبت من السنين أعداء
خسرت فـ كل دور حسره ..
..
هناك شايب في كوتشينتك
أخَد كُل الولاد أسرى ..
..
شريط العُمر فيه كَسره
و مين يعدِلّك المايل ..
و مين كان م الأساس شايل
و مين قايل
بإن القوه هي السيف
تفنّطها
و تاخُد سيف ..
شُعورك باللي جَيّ مُخيف
مابين أصلي و بين الزيف ..
تزوّد سيف
تخاف أكتر ..
و ليه ع اللعب مستكتر
شوية خوف ؟ ..
ياريت نلعب علي المكشوف
و شوف بين الورق كومي ..
أكيد لو ضاع ما راحش بعيد
يا ف هدومك
يا ف هدومي ..
تعليقات
إرسال تعليق