حوار غير تاريخى
حوار غير تاريخي ...
مع جمال عبد الناصر
...
مابحبش الجوابات
انا بس قلت اشتكي
من فرقة الأحباب
جيت اكتبك في قصيده
طلع الكلام في جواب
وأما بعد؛
إيه اللي جابني هنا
وازاي رماني القدر
جنب الضريح وافتكر
ما اعرفش عنك أنا
غير بس حبة صور
ما اعرفش ليه الفقير
ماسك في صورتك كده؟!
أو حتى ليه الغلابه
فاكرينك انت السند ؟!
وانك كمان ضهرهم
ماهو برضه عدى كتير
وانا لسه مش فاهم
ما بين سطور الكتاب
بس الأكيد انهم
بيقولوا كان انقلاب
وانك بدون صندوق
والحكم كان عسكري
ماتقول لي مين كداب ؟!
...
- ) اسأل تاريخ البلد
واسأل أبوك هايقول:
كات البلد منهوبه
كان الفقير مقتول
وف ساقيه كان بيدور
حلم البلد مشنوق
وجاي تقول صندوق ؟!
مش لما يلقي الرغيف
ازاي تحكّم ضعيف
عاجز ومش لاقي
واللا انت مش شايف
ثورتكوا وصلت فين ؟!
عارف مشكلتك فين؟!
إنك ماسك في شوية مصطلحات
ونسيت أصلا لُب الموضوع
ماسك في الصندوق
لكن غـيّـبت الناس
طب كان يختار ازاي ؟!
طب سيبك من دي
قول لي طيب؛ يختار مين ؟!
أحزاب ديكورات من بره معارضه
ومن جوه .. ؟؟
لو كانوا هايترشحوا في الانتخابات
مش كان أولى عملولنا الثورة
وكنا احنا ارتاحنا من الدوشة ووجع القلب
يا ابني الأزمة ما هيش أزمة صناديق
ولا أزمة ديمقراطية
الأزمة ان الصناديق بتجيب ثورة واللا الثورة بتجيب صناديق؟!(
...
يا عم عبد الناصر
كلمني ع العسكر
بقت البلد ثكنات
وف كل شبر سلاح
...
- )يا ابني ده جيش بلدك
هاتقول مالوش في السياسة ؟!
طب مين عمل ثورته ؟!
مش برضه من بعدها
عملوا الشباب ثورة
واختلفوا ع القائد !
لو كان معاكم قيادة ؟!
مش كان زمانكوا رسيتوا
ع البر من بدري ؟!
هارجع برضه واقول لك مشكلتك
تفريغ المصطلحات من مضمونها
آخرتها بتسمي الجيش عسكر
الله يرحم أيامك يا عرابي
لو كان سمعك كان مات بالضغط
واهو روخر كان حلمه الثورة
واتسمت هوجه
الأزمة في اللي بيحكم مش أزمة لابس إيه
ميري والا مدني ؟!
الأزمة ماهيش مين يحكم
الأزمة إزاي فعلاً يحكم (
....
يا عم عبد الناصر
برضه التاريخ غلاب
والساسة ليه كلهم
بيقولوا إنه انقلاب ؟!
....
- )لو كان عرابي انتصر
قبل الختام في الكتاب
كانوا برضه قالوا انقلاب ...
مش برضه ثورة جيش ؟!
مع إنها ما تجيش
بس الغريب كدبهم
ومصدقين نفسهم
لو كنا ما قدرناش
ننزع في سطوة ملك
كنا احنا روحنا بلاش
صفحة ف كتاب التاريخ
ووقتها يدمّعوا
بدمعتين تماسيح
دلوقتي يترحموا
على جيش عرابي البطل
وجمال بقى الخاين ؟! (
...
برضه ما انيش فاهمك
صاب البلد كلها
عدوان ثلاثي وخراب
..
- )القصة مش سينا
ولا هي قصة تراب
القصة كانت كرامة
وصراع نكون أو لا
ولا هي قصة ورق
نمضيه وناخد أرض
لو كان سلام فسلام
لكن ما بين ندين
مش إيد بتمنح هبه
وإيد تبوس الإيد
ماتقول لي فين البلد
بعد السلام .. تابعَه
تحرير لكن ناقص
دلوقتي بتقول خراب؟!
وكإني غاوي حروب !
وانتوا اللي عشتوا ضعاف
وبرضه خدتوا المعونه(
....
"يا عم سيبك بقى وْقول لي كلام ينفع" *
هاتقول لي برضه الكرامه !
وكلام كتب وجرايد
كلمني ع المصلحه
خلينا نستنفع
عشان احنا مصلحجيه
أنا ما اعرفكش صحيح
لكن شهادة حق
لسه الغلابه هنا
متعلقين في هواك
إرجع لهم يا جمال
إرجع لهم يا جمال
تعليقات
إرسال تعليق