قله قيمة
الدنيا بقت قله قيمة
مبقاش فيها حاجه حميمه
وانا مابقاش عندي عزيمه
وجسمي مستسلم لهزيمه
حتى هواكي تحسي بيه مسموم
وانا ماشي ماليني الاحباط مغموم
اخر ليل على فيلم حزين معزوم
دايما عايش فيكي مكلوم
امتى اترقى فيكي يادنيا واخد لقب المرحوم
اهو عند ربي افضل ما اعيش محروم
انا عضو مسالم جدا
بشرب قهوه الصبح وقبل ما انام بالليل بشرب شاي
معرفش ازاي
معرفش اتخانق ولا ازعق
بكره كل الصوت العالي والضوضاء
موبايلي ماليان اسماء
نصهم ما اعرفهمش
بميل للحزن والانطواء
واحب اسمع شعر حزين
قلبي ماليان بناي وانين وكامنجه حزينه
عايشه بس بوترين.
عمري ما سألتك واخداني لفين
بشتري الضحكه بالواحده
واخر مره ضحك عليه الراجل
واداني اتنين ماسخين
مبقتش عارف الملم حزن مين
من فين
جسمي ماليان بالجروح
حتى الطبيب تعب
مبقاش عارف يخيط فين
هي الحياه بتتقاس بالسنين
طب انا لسه في الثلاثين
وقلبي شاب وشعري شاب
حتى العزم مني ساب
العمر يتقاس بالفراق وبالوجع
عم يحي الفيلسوف
كل يوم كل يوم يقول خليك جدع
طب يعني الهم ده ملهوش كبير
مستهيفني انا عايش معايا
واكل معايا متحل عني يا جدع
انا خلاص حيلي اتقطع
وهو يعني فجر الفرح مالوش سطوع
مالاقتش فيك حد يشد عزمي
غير حبل الود
وجيت أشد لقيته يافيلسوف مقطوع
تعليقات
إرسال تعليق