فيزا
اللي عايش فيهـا نفسه
يلقى على باسبوره فيزا
واللي برّه هـزمه يأســه
غُــــربتــه مابقتش ميـزة
واللي واقف بين بينين
لسـه قُــــدامه البابين
لو قفــل بـــاب الحنين
تنجــرح نفـسه العزيزة
إختيـــار مافيهـوش بدايل
ينجـــد الروح من وجعــها
والرحيل بين دمعه شايل
ذكـــريات رافضين وداعها
من بــــــلاد الله لخـلقه
البراح مين اللى خانقه ؟
والونس إيه اللى قالقه ؟
والخطاوي مين خـدعها ؟!
قاسية غـربة روحنا فينا
بين دفا الأوطان وجوعنا
الشراع خـــان السفينة
ولاَّ سلمنــــــا لوجعنـــا
إيـــه اللي خلانا جازفنــا ؟
كان طمـــوحنا ولا زيفنــا ؟!
ف السفر حاضنين نزيفنا
وخــوفنا بيعـــاند رجوعنا
واللي عايش فيهـا نفسه
يلقى على باسـبوره فيزا
واللي برّه هـــزمه يأســه
غُـــــربتــه مابقتش ميـزة
#فيزا
تعليقات
إرسال تعليق