مش مبسوط
مش مبسوط ؟؟؟
يمكن علشان حاسس صوتك
طعمُه سكوت ؟؟
يمكن علشان كل ما تيجى تحُط همومك
دمك ..
جرحك ...
حتى هدومك ...
فوق موازين العدل و توزن ...
تلقى الناتج مش مظبوط ...
مش مبسوط ؟؟؟
يمكن علشان راسم حلمك جوه دواير ...
تايه ..
حاير ...
خايف توصل خط نهاية ...
تلقاك داير وسط خطوط ...
مش مبسوط ؟؟؟
يمكن علشان متلخبط وسط الألوان ...
الأبيض مبقَاش لون واضح ...
و الاسود بقى لون غلبان ...
و الاحمر مبقاش لون دمك ...
بقى لون حَبة ف شجرة توت ....
مش مبسوط ؟؟؟
يمكن علشان قلبك خايف ...
فاتح عينك .. مانتاش شايف ...
مش فاهم دى دموع الفرحة ...
و اللا أنين حزن و مكبوت ...
مش مبسوط ؟؟؟
يمكن ...
جايز ...
بس أكيد ...
لو قلبك عايز ...
تقدر ترجع زى زمان ...
تقدر تهرب م الأحزان ...
تقدر تخرُج بره الدايرة ...
و ترجٌع معنى الألوان ...
تقدر تكتب ف العنوان ...
انا انسان ...
حُـــــر ...
و مبسوط
تعليقات
إرسال تعليق