روحين
روحين مضفرين علي بعض
وروح بتكمل التانيه
وروح تعبانه هجر وبعد
وروح عشمانه ف الدنيا
وبيوت بتضم الف طعم والطعم ميال لبيوت تانيه
روحين ميعرفوش البعد ..
ميفترقوش و لو ثانية :)
ولو البعد نال منهم بيصبح قربهم دنيا
فى روح تبعد وروح ب تشد
يا عشقي في السما والارض
ونصيبي كمان في الجنه
روحين ما بينهم وعد ...
في دنيا أصلها فانية
فى روح تبعد وروح ب تشد
يخافوا البعد لو ثانيه ..
سجاره وريحة القهوه
وصوت فيروز
علي الغالب
يغطي النبض لو غالب
روحين مضفرين علي بعض
وروح بتكمل التانيه
وروح دايره بتبعت للهوا مراسيل
وزاهده دنية المخاليق
بتوسع حبه ثم تضيق
بتخلق من وجعها صديق
يسافر بيها للجنه
وتغزل م الوجع مسافات يطير فوق السما التامنه ..
روحين مضفرين على بعض
وروح بتكمل التانية
وروح بتروح فى وقت البعد
فيحيها اللقا فى ثانية
روح بتدور فى الملامح
عن التايه فى احلامها
بتنده على ماضى فات
بسرعة قدامها
جمعت منهم كام ذكرى
جميلة وكأنهم يوم وليلة
ولا هبعد هواك ثانيه
معاك الوقت مهما يفوت
معاك عشقاه
وبتمناه
يطول اكتر
يا ورد ف ليلي بيزهر
ياعطر ف أيدي بيطهر
ذنوب الكون
انا المجنون
انا العاشق وانا الدرويش
معاكي هعيش
روحين مضفرين على بعض
و روح بتكمل التانية
و قلب بيرسم الدايرة
بيمنع هوا الحساد
وروح مشبوكه بفيونكه
برغم ان الايادى بعاد
و روح متاخدة م الدنيا
عشان بين النهاية ميعاد
و روح بتطوف و بتسافر
تقابل قد ما تقابل
بتفرح برضو و تجامل
تكمل عمرها الفاضل
و تطرح منه شوق يطرح
نتيجة بتنتهى بحداد
روحين غرقانين فى الحب
و نسيو قساوة الدنيا
روح بتعشق قلب بيداوى الجرح فى ثانية
روح قادرة على البعد عن الثانية
و روح متقدرش تعيش من بعدها ثانية
و روح بتحب فى روح و روح عاشقة لروح ثانية
روحين مضفرين ع بعض
وروح بتكمل التانيه
الاولي للكره بغض
وف حياتها عايشه
كالخاينه
وروح الطيبه قاتلاها
ملاك ع الارض ماشيه
يارب ماحلاها 😍
روحين مضفرين علي بعض
وروح بتكمل التانيه
وروح بتواسي وتطبطب وتنسى جرحها ف ثانيه
بتتمايل وبتحايل نجوم الليل
وتبعت للسما مواويل
عشان في نجمه تشبه روح محوطاها
وسكناها بتعشق روحها في لُقاها
امانه عليك يا صبح تغيب
حبيبتي في السما شايفها
وهسهر حبه وياها 💙
وتاهت دنيتي مني
وراح العمر يشكيلي
وشايلك جوه في النني
وانور بيكي قناديلي
وروحي اصلها منك
وروحك دربي ودليلي
وروحين منسخوين من أصل
بتفرق بينهم المسافات
وروح عايشه للحظة وصل
لو حتى ميعادها فات
وروح مجتاجه 200 قصه
لسرد وجعها بنص قصير
ونصى عاجز ف وصف حالتها
مشتاقه للبعد برغبتها
مشتاقه للعيون خطفتها
وانا تايه من يومها بدور
عن سبب الصمت ف ضحكتهاا
روحين مضفرين علي بعض
و روح بتكمل التانية
ضفيره و عقدة مجدولة
قصاد البعد
و كيف البعد
يستجري يفككها
دة نبض قلوب مشبكها
و ضل ف ضل شايل حد
و مزيكا بدون ولا صوت
بتعزف بس بقلوبهم
و تسكت لجل تسمعهم
و توجعهم
قصيدة بيوتها بتزورهم
و بيت بيشد بيت ف سماه
و بيت ينزل لسابع ارض
وموت
قاصد يهد حياة
و كل حياة ناقصها الموت
يوصل للحياه التانيه
تعليقات
إرسال تعليق