انا ايوب بقلم مينا روفائيل
انا ايوب
انا اللى تهت من نفسى فى سكك ودروب
انا اللى نفسى اشوف نفسى بشر محبوب
انا ايوب
قالولى كمل و سيبهم يحدفوك بالطوب
و لسة يادوب
ماعدتش فى الوجود موجود و باقى الطوب
صابر و الصبر بقى شىء منى مش مرغوب
لقيت صورتى فى حيطان دايبة فى بيت منكوب
انا ايوب
خناق جوايا بين مرهوب و بين مرغوب
مابين اخترت او مكتوب
وعمر بيجرى قبل ماتيجى لحظة نتوب
مفيش غير حيرة ازلية تهز قلوب
انا ايوب
صبرت بنفسى مالقيتش اللى عنى ينوب
باعيش بين لحظة و التانية حصار و حروب
عايش فى مصير معادش بقالى منه هروب
ثمار من كثر ما صبرت اصابها عطوب
انا ايوب
انا الاعمى و عيشت حياة ماشوفت عيوب
كملح الارض مابيغرق لكن بيدوب
شجاع بين الخطر شكلى لكن مرعوب
شفيت وخلاص يادوب لمسة لهدب الثوب
انا ايوب
قالولى عنك انك انت رب قلوب
قالولى انى عندك الغالى المحبوب
ولو باغرق فى بحر عيوب
دا مين غيرك يزيل من نفسى اى ذنوب
انا ايوب
Mina N Rofael
تعليقات
إرسال تعليق