مش قولتلك ياامه(زينة)
مش قولتلك ياامه
هعاود ومهسبكيش
مش قولتلك....
خليكى معايا شويه
ومتفوتنيش
مش قولتلك....
خليكى هناك وانا جاية
قولت جاية وجيت اانا
وملقتيكيش
قلت راح اعود من غربتى
واقعد حداكى ..ومهسبكيش
عجلتى بدري بدري
ولميتى خلجاتك وطيرتى
ومعاودتيش
لية ياامه؟؟
طولتى الغياب
كان لسة بدرى ع الفراق
منتى عارفه يعنى ايه غربة
ويعنى ايه مفارقة الاحباب
انا عند وعدى ..
وجيت لحدك لجل اعيش
لجل اعيش اللى باقي
ف حضنك انتى
واسيب ورايا
ناس غريبة ومهسبكيش
جيتلك انتى وبعترف
طولت شويه ف غربتى
وغصب عنى لقيت نقرات
ف سكتي..
بقيت ازحها...
لجل اجيلك وارمي كل
الموووت ورايا..ومعاكي اعيش
لقيت الموت ياامه محواطنى
من كل نحية وكل جيهة
وباينه عاشقنى..ومبينتهيش
مش هتيجى ..
مش هتيجى يعنى واترمى فى حضنك
زى زمااان
طب ولما اشتاق ف يوم انى اضمك
اعمل ايه..اقول كمااان
طب ولما احب ابكى
مين حيمسح يوم دموعي
ويقولى قومي
يلا يابت فزي قومي
احمي الفرن واخبزي رغيفين
وعلقى عالشاى كمانى
واعدليلنا كوباتين
وتقليه شويه
وحطيله نعناع مرعرع
فيه هناك عرقين
فاكرة يااما لما حطيتى
حلة المحشي ع الكانونين
ورحتى نقلاهم على حلتين
قلتى حلة لينا وحلة لاخوكى
اللى ف الديش
هوة والواقفين خدمة معاه ..
على مااغسله الهدمتين
يلا يابت فزي قومي
لسة هتبصيلى عاااد
قومي يلا واعمليلك همتين
كنتى لما تقولي كلمه يقفولك
بدل الشنب شنبين
نفسي يااما ترجعيلى
واعمل كل شئ عوزاه بهمة
عارفه ياامه ..
عارفة لو ساعتها قولتي
لو قلتييييي
لو قلتي اخبزيلنا
لاخبزلك بدل الرغيف... كيلتين
ولو طلبتى القمر نفسه
لاطلع واجيبلك من الهلال قمرين
بس ارجعيلى انتى وشوفي
هعمل ايه..
لجل اطل في عيونك
بس ياامه طلة واحدة
لاااااااا طلتين
تعليقات
إرسال تعليق