مصر بقلم أحمد مخيمر
قصيده بالعاميه المصريه
مصر
يا أم وأب وحامي
أوعي فيوم تزعلي لكلامي
وإن يوم غضبي مس كرامتك
هتسامحيني قبل سلامي
مش مغرور ولا شايف نفسي
بس أنا إبنك
حقي عليكي تحسي آلامي
وفأحضانك هبكي وهاصرخ
مانا دمعي من كتر غرامي
هو ده ذنبي....كبرت فحضنك
ولا قلت أتغرب وأهاجرك
ولا فكرت إن أنهش لحمك
من صغري بقيت فيكي الحامي
أحمي إخواتي من بعضيهم
وأضرب إيد الغادر فيهم
وأحفظ قسمك وأنشده ليهم
شايف مجدك فوق أحلامي
وعلشان أبقي قد الشيله
شربت العلم كمان بالكيله
وإتربيت بأيادي أصيله
قالو يا ولدي مصر العيله
وكبيرها بالأدب السامي
أصل دي مصر حضاره وهيبه
وتاريخها ما يحميه غير شيبه
شيبه بعقله مهياش دقنه
أصل الولد بعقله العالي
يغلب كل دقون الشيبه وعقلها خيبه
وأنا صدقت ياامي علامي
قالو عليكي كمان ولاده
والخير منك يجي بزياده
فأنا حبيتك فوق العاده
ووهبتك روحي وأحلامي
وأدي أخرتها
عيالك البكري هدو مقامي
خايفيني أكبر وأبقي الحامي
ولما كتبت الشعر فحبك
حبسو كلامي
وأما دموعي نزلت فيكي
سبقوني ليكي
علشان صوتهم واصل عني
قالو غرامي
وكرامتي بقت من اوهامي
ردي يا أمي وشوفي مظلمتي
أصل كلامي ده حال أجيال
مش بس كلامي
إحنا حلال من صلبك فعلا
ولا عبيد موهوم بأغاني
ردي وقولي....صوتنا واصلك
طب شيفانا ...... خدينا ف ضلك
ولا السور اللي بنوه بينا
حاجب عنك حتي سلامي
مهما فروع الشجره ما تعلا
مرسالها بيوصل ف ورقها
ينزل يحضن جذرها تاني
وكأنها بتقول لجذورها
مهما عليت بهديكو حناني
وإنتي ياعاليه فروعك غابت
وجذورك فالأرض إتعابت
وبداء الحرمان إتصابت
وأدي ولدك علي ولدك جاني
_______________________
احمد مخيمر ٢٣\٧\٢٠١٧
تعليقات
إرسال تعليق