مصيف بقلم جمعه عبد الجواد
مَصيَف
،،،،،،،،،،،،،،
تلات بنات وامهم
واتنين كمان م البنات
أولاد خِيلانهم حبايبى
يا سلام على الخُروجات
والعبد لله ...بقينا
راجل وست ستّات
روحنا رحلة نصيّف
م الجمعة لقبل التلات
يامثبّت العقل إكرم
وارزق عقولنا الثّبات
عيال خفيفة وظريفة
واصل مفيش مشكلات
المشكلات مش عنيفة
حاجة كدا مناوشات
ع الكرسى ..ممكن ..بتحصل
فى أحسن العائلات
دى جنبى أو دى ورايا
الناس يا ناس راحات
ومين هيطبخ ويغسل
مين يعمل المشروبات
دى عاوزة تتغدى كشرى
ودى طالبة مشويات
دى عاوزة تتغدى بدرى
ودى لمّا اغسل الملايات
يا سلام بقا عالسّمر
وقاعدة الأُمسيات
اللب طبعا أساسى
والقعدة فى البالكونات
حاولت أركّز معاهم
وألقُط الكلمات
والله ما قِدِرت طبعا
هيهات بقا هيهات
كلمات كثيفة وسريعة
كمدفع الطلقات
بتنطلق نَحوَ وِدنى
من كل الاتجاهات
الكل شغّال دودودو
مفيش كدا خُد وهات
أضطر أنفد بِجِلدى
وأقرا فى مجلات
عاوز أقول فى النهاية
هُنّ عسلِيّات
يارب بارك فيهنّ
يارب خَللى البنات
جمعة عبدالجواد
٢٠١٧/٧/٢٤
تعليقات
إرسال تعليق