الأوباش بقلم طارق السيد
الأوباش
إنجدنا يارب من الأوباش
من دول ناس حوش ياحواش
المستحمر أبو خد أحمر
إللي تملي يأتت فينا
وغد بفخد وكرش ولغد
يربي في لغده ويلدغ فينا
والمستقوي بعضلات جسمه
ومعجب جدا بجمال رسمه
يا إما يطلّع عيني ياناس
ياإما في رزقي ياخلق أقاسمه
حوش ياحواش إللي مخلاش
في جيوبي حتى ولو مليم
ودا نوع تاني من الأوباش
مستخسر فيا الملاليم
واكلها إبن المستعبط والعة
وكل شوية يغلي ف سلعة
أسأله بس إزاي بتاكلها
يرد يقوللي دا سر الصنعة
إحمد ربك إنك عايش
وإتنفست سنين ببلاش
إعقل بقى وإتلم ياطايش
يكفيك إن هواك ماإنحاش
حوش ياحواش أوباش الغابة
كلاب وغيلان وضباع وديابة
نازلين نهش ونتش ف لحمي
تقولش ف لحمي مالذ وطاب
أنا غلبان وأغلب م الغلب
نحيل وهزيل وضعيف القلب
بخاف م الديب والغول والضبع
وكاره عوجة ديل الكلب
بقلم طارق السيد
تعليقات
إرسال تعليق