دهاليز التوهه بقلم طارق السيد
دهاليز التوهة
الأولة غربتي
والضلمة سجّاني
والثانية سكتي
والتوهة وخداني
والثالثة كلمتي
وهقولها من تاني
آه ياعيني آه
ع الوعد والمسطور
إمتى ياليل الغربة
عنيا تشوف النور
الغربة مرة بره
وأمر بألف مرة
الغربة الساكنة فيا
والتوهة إللي بتاخدني
وتدور وتلف بيا
وأتكعبل في الملف
وأقوم من تاني ألف
مشدود من وداني
أرجع لبدايتي تاني
ومن تاني أرجع وألف
محروم من الأماني
ممنوع من الأغاني
بكرامتي إللي بيإلمها
الشد من وداني
وفي وسط التلافيف
ماسمعت غير حفيف
أوراق الشجر الجافة
من هجمة الخريف
وف دهاليز العتمة
تخطفني الخطاطيف
تقطم لها كام قطمة
من بدني الضعيف
الأولة شكوتي
من دنيا ظلماني
والثانية أهرتي
من مر في لساني
والثالثة حسرتي
على ضحكة وحشاني
ياضحكة بعيدة عليا
إعملي معروف فيا
زوريني في السنة مرة
وردي روحي شوية
أنا روحي طالعة بره
من طعم الدنيا المرة
ماهي دنيا بتفتن فينا
نتعشم يوم تكسينا
ونتغطى بيها نتعرى
بقلم طارق السيد
تعليقات
إرسال تعليق