محتاج لك بقلم عبد الحميد علي
محتاج لك
كَـبَّر.. تعيشْ
قُول للِّى
محتاجْ لَكْ
مفيشْ
اللى اختَشوا
ماتوا خلاصْ
إتعلَّم إنت
ما تخْتِشـيش ْ!
الليل هَجَمْ
إنتَ اللِّى
شّيِّدت الهرَمْ
بتمدّ إيدكْ للعَجَمْ
شَاغِل دمَاغَكْ
مين
هيحْكُمْ البلدْ ؟
تِفْرِقْ مع الأرنب
ْ ف إِيه
لو راح أسدْ
وغزَالْ حَكَمْ ؟!
**********
كـبَّر بَقَى
هوَّه انتَ
فَرْحان بالشَّقا ؟
هوَّه اللِّى كـبَّر
كان تِعِبْ
وللاَّ اللِّى دَوَّر
كان لقَى؟
مِن كام سنَة.
شايل حضارة
كام سنَة
بِتلِفّ بيهُم
عَ الجيرانْ
تفرِشْ
ستارة قُوّتكْ
تخَبىِّ ف الضَّعف
اللِّى بانْ
تفرحْ عشان
نقْل الملِكْ
ترقص
ْ عشان المقبَرة
إزَّاى
هتمشى المركبة
لسَّاكْ
بتتشَعْلقْ وَرَا ؟!
زَحَف التَتَار
على باب مدينتَكْ
انتَ تايِهْ
ف السؤالْ
هل ياتَرى
خوفو اللى
بانى الأهرامات
لُهْ كام وَلَدْ؟
مين مَلـِّكُه
إمتىَ اتولَد ْ؟
قبل امَّا تمسِكْ
ف " التـَّاريخ "
إمسِك
ف "جغرافيا " البَلَدْ !! "
*********
طُول عُمرنا
طُول عُمرنا
بْنِكْتِم جراحنا
فْ قلبنا
آخْر السنة
نكتب على
وِشّ النتيجة :
" عامْ سعيدْ !! "
طُول عُمرنا
نِروِى
أمَلنا بصَبرِنا
يطرَح
ْ أمَلنَا صَبرِنا
الصَّبر يطرَح
مِن جديدْ
طُول عُمرِنا
الحِيط
ْ بيمشى جنبِنا
نغَنىِّ بُكرَة
الخير يزيدْ
طُول عُمرِنا
بنْبيعْ ف راس
ْ سِيدنا " الحُسين "
علشان "يَزيدْ" !!
**********
هَتعيشْ تهادِنْ
مرْحبَا
هَتعيشْ تنَاضِلْ
مَرْحَبينْ !!
كلّ اللِّى
بيناضِل مهادِنْ
إنتَ بس
ّ تروحْ لمين؟
أحسن لك
اهرب مِ الحَالِين
عِيشْ بِينْ وبِينْ
إيَّاك تقومْ
إيَّاك تنامْ
إيَّاك تثُورْ
إيَّاك تحبّ
إلبِسْ قميص الدَرْوَشَة
الدمّ كِدْب ْ!!
إمْسِك
ْ بسيفْ المعرَكَة
ارقُصْ على
ضَهْر الفَرَسْ
اشْتِم فى
كلّ السجَّانين
اشتِم ف كل
ّ اللِّى اتحبَس !!
تهرَب لفِين؟
اسمَكْ مُجرَّد أمْر
ف جيوب العَسَس ْ!!
**********
إحْنا اللِّى
بنفكَّر غَلَطْ
إحنا اللى
عايشين بالعَبَطْ
إحْنا اللى بنموت
ف المعاركْ
المدابحْ
فْ سَواد البحرْ
فْ قَطْر الغلابة
ف السلام !!
إحنا اللى
عايشين والسلام !!
إحنا اللى
مش فارق
معانا الأغلبية
والمعارضة
إحنا اللى لمـَّا
نشوط أمَلْ
لازم أكيد يضرَب
ف عَارضَة !!
إحنا اللى
سامعين الكلامْ
إحنا اللى
سامعين الأوامر
مِن " صباح الخير
يامصر "
لْحـَد ّ " قرآن الختام "!!
إحنا اللى
راضيين باللى
فَاضِل مِنُّهُمْ
بالشّمس
هلال الشّهور
علشان نصُوم !!
أغلب من
الغُلْب الغَبى
همومْنا
بتبَكِّى الهمومْ
بنعيش خفيفْ
ننام خفيفْ
نموت خفيفْ
طبْ ليه بقَى
بعد اللى فاتْ
مات اللى مات
فى طابور طويل
علشان رغيفْ ؟!!
**********
هُوَّه احنا ليه
مش محسُوبين
رغم انّنا
بنـزيد كتير
الله أكبرْ
نِتْعَدّ بسّ
ايام صناديق
الانتخاب
ساعتها بسّ بحكْمِتُه
بْنتعَدّ أكتَر !!
*********
كَبـَّرْ
فكَّرْ
ف انتخابات النوادى
فى أمور المنتخب
الكاس
ف لِبْس البنات
تابِعْ مسابقات
الجَمال والموضة
دَافِعْ عن رِيادتَك
ف الدّراما
إحنا أجدع
ْ مُنتجِين
لمسلسلات ْ!
عِيشْ زَيّنا
إيَّاك تفكَّرْ
ف اللى جَاىْ
خَلِّيكْ
مَفيش ْ!!
حَظَّكْ كِدَه
فَكـَّرْ
تموتْ
كبر تعيش
محتاجلك كدا
محتاجلك كدا
@@@@@@@@@@
سندباد العامية
الشاعر / عبدالحميد علي
تعليقات
إرسال تعليق