نفسي ف ولد بقلم ياسر الدمينى
نفسى ف ولد
شايفك يامصر بتتغيري
بتغيري عهد الكسل هاتغيري
هاتحولي حياتنا من نار لنور
والكل في حبك يدور
مافيش أحزان مافيش الم
مافيش شباب في سجون بقضايا تطلع من عدم
مافيش ظابط قاعد سيجارته هتاكل ايديه
وقبل مايقول البطاقة بيرفع ايديه
طبعا مش هايسلم عليه
ده عشان هايضرب بالقلم
قلنا خلاص مافيش الم
خلاص يامصر مصدقك
نفسي يامصر من الخضار
تلغي الكوسه والخيار
نفسي حياتنا تبقى جد مافيش هزار
نفسي اشوف فيكي ولد
طالع من صلبك سند
نفسي اشوف فيكي ولد
فاروق بجد رحيم على اهله
وعلى العدو يشد شد
ويرجع للإسلام كرامته والعرب
ويلم كل اللى منك هرب
علماء كتير وشباب كتير بره البلد
هو فين بس الولد
اللي هايلم شمل البلد
ويجيب ولادنا من بعيد
'تبقى كل حياتنا عيد
مافيهاش ايد على الغلابه حديد
و للكبار بتقول مدد يا سياد البلد
نفسي ألم كل دكاتره البلد والجراحين
عندنا عمليه بتر لكل النصابين والمحتالين
وكل اباطره البلد
هو فين بس الولد
نفسي يا بلدي الرحمه فيكي تسري
زي نهر النيل بتجري
مايكنش فيكي دراكولا ولا مصاصين دماء
ولا ناس تجيلها تخمه من الثراء
نفسي ف ولد رحيم
يعلم اغنيائك الرجيم
ويبطلوا اكل الثمين
من دم البلد
نفسي ف ولد
تعليقات
إرسال تعليق