لسه ناوي ع السفر بقلم الشاعر عيسى عبد الرؤوف

******* لسه ناوى ع السفر ******

لسه ناوى ع السفر
ولا القدر نادى عليك
وتنسى إسمى إللى إتحفر
بلاش حبيبى أنا روحى فيك

خايفه لما تروح هناك
تنسى يوم إن ليك حبيب
وأتوجع وأنا بستناك
وتقيد فى فلبى نار لهيب

ويوم ورا يوم تنسانى
وتاخدك يوم قلوب منى
وتنسى حتى عنوانى
وتقوللي كمان غصب عنى

بلاش حبى دى الغربه
ليلها طويل مالوش أخر
وتسبنى أعيش حياه صعبه
وأملى فى بكره يتاخر

بتوحشنى وإنت قريب منى
وإزاى فى بعادك أنا أصبر
ويضيع قلبك فى يوم منى
وأسهر ليلى وأفكر

جاوبنى حبيبى بصراحتك
فين راحت لمعة عيونك
دنا عايشه عشان راحتك
وشايفه الهجر فى لونك

ومتحير ومتغير ** وشتايفه مصيرى فى كلامك
دا حتى مانيش بقيت حاسه ** بحضن إيديك فى سلامك

أقوللك إيه وإيه تانى
فى عز ضعفى وخضوعى
وبيضيع منى عنوانى
وف لحظه بتنطفي شموعى

أشكى لمين ياناس حالى
ومين من الجرح يداوينى
دا هو حياتى ورسمالي
دا حبيى ياناس ونور عينى

==========================
كلمات الشاعر الغنائى عيسى عبد الرؤوف
الكلمات مسجلة وحقوق الملكية محفوظة للشاعر (70152-6-2-2017 )