ازيك بقلم ياسر الدمينى
ازيك
ازيك وازي اخبارك
أحكى لى بقى عن أحوالك
طمني عليك من الاول
من يوم مارفضت تكمل
وانا عارفه ان انا غلطانه
وجايه إليك ندمانه
هاتقولي ماينفعش نكمل
ونجيب القصه من الاول
انا عارفه ده كله من الأول
مش جايه اقولك ترجع لي
بس اكيد عوزاك تسامحني
اصل انا عارفه ان انا غلطانه
و راجعه إليك ندمانه
سكت ووقفت مبلم
ولا عارف انطق ولا اتكلم
ولا حتى اقفل ولا اكمل
وسكوتي كان فرصه كبيره
تتأسف فيها وتتكلم
سيبك بقى من كل زمان
انا راجعه بضمير ندمان
طمني عليك من الاول
من يوم مارفضت نكمل
مين اللي دلوقتي مكاني
و قصايدك نسيت عنوانى
انا ولا بقى حد مكاني
وياتري حبيت من بعدي
ولا عايش على احزاني
لا وآلله انا حبيت
حب خدني لحد البيت
وحضن يضم وقلب يراعي
وعين تحلم وتحقق وكلامنا بيتصدق
طيب ليه حساك مهزوم
وفي اشعارك مهموم
انا جايه ببدايه جديده
وهاكتبلك قصه حب سعيده
وعارفه أن انا غلطانه
و راجعه آليك ندمانه
رديت عليها بصعوبه
وكلامي بقى بأعجوبه
مابقيتش عارف اتكلم
ولا عارف اقفل ولا اكمل
و خدتنى العزه الابيه
ورديت رد عليها صدمها
وكسر كل أحلامها
قوليلى مين انتي الاول
علشان أرفض أو اتكلم
ردت زي المذهوله
وكلامها اتغير وعيونها فيها دمعه كبيره
ومعاه معاني كتيره
بتقولى انا عارفه ان انا غلطانه
و راجعه إليك ندمانه
ردت انا حب زمان
مكتوب في كل مكان
هاوصف لك تاني من الاول
وانت براحتك لو هتكمل
من يوم كنت انا تلميذه
وكان بينا صداقه عزيزه
فاكر قعده النادي
والذره والحمص ع الكورنيش
وهزارك ويا بتاعه العيش
وانا قاعده بتكتك من البرد
كلامك كان بيدفيني
ممكن يقتلني ويحييني
و احكيلك على أحلامك
واعيد لك كل كلامك
و بحبك وبحب غرامك
وتذاكر سينما التحرير
وخروجنا كتييييييير
وولادنا اساميهم ايه
وتأكدت انها هيه
ولسه زي ماهيه
وانا كدبت صوتها وعنيه
لكن انا بتأسف اصل ماينفعش نكمل
قالت انا عارفه من الأول
وعارفه أن انا غلطانه
و راجعه إليك ندمانه
واحكي لي من الاول
حبيتها وحضنك بقى بيتها
وفيه تضحك وتدمع
انا حافظاك وبسمع
يعني هي في اشعارك
وبقي ليها كل كلامك
وبنيتوا أحلامي واحلامك
انا عارفه ان انا غلطانه
و راجعه إليك ندمانه
انا اسف مش هاقدر اكمل
ولا هاقدر تاني اتحمل
واعتذر هاقفل دلوقتي
اصل حبيبتي واخده في وقتي
استأذن وبقول سلامات
واتمنى لك كل الخيرات
بس أنا جايه ندمانه
وعارفه أن انا غلطانه
تعليقات
إرسال تعليق